MANILA, Philippines – Ginsuspende sang Energy Regulatory Commission “ERC”, ang koleksyon sang Green Energy Auction Allowance “GEA-All”, para sa billing months sang Mayo kag Hunyo agud mapakamenos ang bayad sa kuryente sang mga konsumidor.
Suno sa pahayag sang ERC, temporaryo nga ginpahunong ang koleksyon sang GEA-All nga 37 centavos kada kilowatt-hour (kWh) para sa tanan nga power consumers sa bug-os nga Pilipinas.
Ang GEA-All charge ginagamit agud pondohan ang mga proyekto sa renewable energy pareho sang solar, hangin ukon wind, kag hydro projects nga ginapalambo sa ilalum sang Green Energy Auction Program.
Ini nga programa nagatuyo nga magduso sang dugang nga pamuhunan sa sektor sang renewable energy sa pungsod.
Ginpahayag sang ERC nga ang kasamtanan nga pondo yara pa sa igo nga level agud masustiner ang bayad sa mga kwalipikado nga renewable energy projects bisan pa ginpahibalo ang temporary suspension sang koleksyon.
Sa karon, ginapaabot nga ang tikang makabulig sa pagpakamenos sang gastohon sa kuryente sang mga konsumidor sa masunod nga duha ka bulan.
