Tapaz, Capiz – Ginkumpirma sang alkalde sang banwa sang Tapaz nga wala pa matapos ang kontrobersiyal nga road concreting project sa Barangay Artuz, Tapaz.
Ginpahayag ni Mayor Roberto ‘’Nonong’’ Palomar, ba-se sa pagtsekyar sa proyekto sang bulan sang Disyembre, wala pa ini sa gihapon matapos.
Nagdihon man sang pila ka mga tikang ang ila gobyerno agud indi na masulit ang iregularidad sa mga proyekto sang gobyerno nga yara sa idalum sang Department of Public Works and Highways (DPWH) Capiz 2nd Engineering District.
Partikular gintumod nga tikang ni Mayor Palomar ang koordinasyon sang mga contractor kag DPWH sa LGU antes ang implementasyon sang proyekto.
Nahibaluan nga nagsulat na ang opisyal sa Regional Office 6 sang ahensiya matapos nabuyagyag ang iregularidad nga nahinabo sa proyekto sa idalum sang pagdumala ni district engineer Dene Baldonado, apang wala pa sila sang nabaton nga sabat.
Ginapanindugan ni Palomar nga wala pa sang 50 porsyento nga natapos ang road concreting project sa Barangay Artuz, Tapaz, apang ginapaguwa sang ahensiya nga 98 porsyento na ini nga natapos nga isa ka daku nga kabutigan.
Gin-ako man sang alkalde nga madugay na sini nga ginahinyo sa regional office sang DPWH nga ilisan na si Baldonado bilang district engineer bangud sa madamo nga kapalpakan kag iregularidad nga nahinabo sang panahon sang iya administrasyon, apang wala sila sang reply nga nabaton.
Ginapanindugan pa ni Palomar nga ginahimo sini ang iya obligasyon bilang alkalde kag proteksyunan sini ang mga pumuluyo.
Samtang sa maabot nga Pebrero 18, 2021 ang blessing sang government center building sa ila banwa nga may pondo nga P110 milyones.
SA pihak nga bahin ginkumpirma sang opisyal ang ila pagkit-anay ni Capiz 2nd district congressman Fredinil Castro, matapos nga nagbisita ini sa iya nga talatapan sang damlag lang.
