Ginbasura sang Commission on Elections (Comelec) ang hinyo sang kampo ni detained Pastor Apollo Quiboloy nga pagpatigayon sang manual recount sang mga boto sa bag-o lang nagtakop nga 2025 midterm polls.
Ginpaathag ni Comelec Chairman George Erwin Garcia nga wala ini gintalana sang layi.
Suno pa kay Garcia, ang paglunsyar sang isa ka election protest ang nagaisahanon nga paagi agud mag-angkon sang isa ka manual recount.
Una na nga ginpahayag ni Atty. Israelito Torreon, legal counsel kag spokesperson ni Quiboloy, nga ang Comelec ang may motu proprio powers agud magpatigayon sang manu-mano nga recount sa mga boto bisan wala sang magpetisyon para diri.
Dugang pa sang abogado, ang manu-mano nga pag-isip sang boto sa precinct level ang nakamandato sa Section 31 sang Republic Act 9369 ukon The Election Automation Law.
Bilang sabat, ginpahayag ni Garcia nga bilang mga abogado, may ara sila sang tagsa-tagsa ka interpretasyon sa layi.
“So if our automated election would have that kind of feature (manual recounting), the law should change. The law should prescribe as to how we would do that. Otherwise, after the elections, the Constitution itself said, the best course is election protest,” paathag pa ni Garcia.
