Ano abi kag matukiban mo nga ang imo ginabalik-balikan nga kalan-an may dako nga sikreto kaangay sang wala malimpyuhan nga gamit sa sulod sang pila ka tuig, kag sa gihapon ginagamit nila sa pag-serve sa imo sang pagakaon, mabalik ka pa ayhan?
Viral sa social media ang sa ka kilala nga restaurant sa Tokyo, Japan matapos nila nga gin-ako nga kapin tunga sa siglo na nila nga wala ginalimpyuhan ang butangan sang ila nga barbecue sauce.
Sang damlag lang, na-feature sa isa ka Japanese TV show ang restaurant nga Abe-chan, isa ka kilala nga yakitori (barbecue) restaurant kun sa diin ginpabugal nila nga ang sikreto sa manamit nila nga yakitori amo ang sauce jar nga wala nila ginalimpyuhan sa sulod sang 60 ka-tuig.
Madamo sang tumalan-aw sang nasambit nga Japanese TV show ang nakibot sang makit-an ang sauce jar nga naputos na sang madakmol kag nagabilog nga barbecue sauce. Suno sa tag-iya sang Abe-chan, wala pa nalimpyuhan ang sauce jar umpisa pa sang 1960s kag nagapati siya na ini ang nagapanamit sa ila nga yakitori.
Sang ginpamangkot ang tag-iya kun sya bala wala nahadlok nga basi kag may cutomer sila nga magmasakit ukon ma-food poisoning, confident sini nga ginsabat nga malimpyo ang mga pagkaon nga ila gina-serve kag kun mahigko man suno sa iya ang ila nga sauce jar, ginaluto nila sang maayo sa kalayo ang ila ginabaligya nga mga pagkaon kag safe ini sa bacterial contamination.
Nag-viral online ang sauce jar sang Abe-chan kag nagka-ara sang diskusyon ang mga Japanese netizens hanungod diri. Pila sa mga ini ang ginpangligna-an kag ginsiling nga likawan na nila nga magkaon sa amo nga restaurant. Madamo man sang mga suki sang Abe-chan ang nagpangunapin diri kag ginsiling nga wala sila nagmasakit matapos magkaon diri sang madamo nga beses.
Bangud sa nangin kontrobersiya, gina-abangan na sang netizens kag customers sang Abe-chan kun bala limpyuhon na nila ang sauce jar ukon ipabilin sang tag-iya ang tradisyon sang ila nga restaurant.
