BOMBO ROXAS – Natalana nga ipaguwa sa masunod nga semana sang fact finding committee ang resulta sang ginpatigayon nga imbestigasyon sa alegasyon nga anomaliya kag iregularidad ni Provincial Jail Warden Arjuna Yngcong kag Administrative Officer Andreo Llaver.
Ginpahayag ni Provincial Human Resource head Francisco ‘’Bobot’’ Dariagan may rekomendasyon kag reporma nga patigayunon kun mapatud-an sa imbestigasyon nga may paglapas ang natungdan.
Gindugang pa ni Dariagan nga may mga alegasyon nga naklaruhan sila kag may mga impormasyon nga wala nila nahibulan ang nabuyagyag sa ila.
Sa matandaan nga temporaryo ginsaylo si Yngcong sa Provincial General Services Office (PGSO) samtang ginapatigayon ang imbestigasyon sa gindalahigan sini nga issue angut sa ginbuyagyag ni anay Administrative Officer Andreo Llaver nga iligal nga bulohaton ni Yngcong sa sulod sa Capiz Rehabilitation Center (CRC).
