Ginbaton ni anay Supreme Court Senior Associate Justice Antonio Carpio ang pagpanghangkat ni Sen.Rodante Marcoleta para sa public debate sa West Philippine Sea.
Ini matapos ang nagluntad ang issue sa West Philippine Sea kag kon bala ini ang nagalakip sang mga maritime features sang Kalayaan Island Group.
Suno sa pahayag nga nangin kontrobersiya ni Marcoleta nga mahimo nga i-give up na lang sang Pilipinas ang pila ka bahin sang Kalayaan Island Group (KIG) bangud indi sakop sang Exclusive Economic Zone sang pungsod.
Ginkontra naman ni Philippine Coast Guard Commodore Jay Tarriela, ang pahayag ni Marcoleta kadungan sang pag-agda niya nga mag-upod sa Maritime Domain Awareness flight agud makita ang actual nga sitwasyon.
Magluwas kay Carpio, luyag man ni Marcoleta makigdebate kay Tarriela kag Prof. Jay Batongbacal sang UP Institute for Maritime Affairs and Law of the Sea.
Kilala si Carpio nga manugpangapin sang kinamatarung sang Pilipinas sa WPS, ilabi na pagkatapos sang 2016 arbitral ruling nga nag-invalidate sang nine dash line nga pag angkon sang China.
Samtang ginalauman naman sang pila ka mga observers nga ang debate magapa-athag sa publiko sang legal nga basehan sang WPS kag ang importansya sang katuyuan sang soberanya sang Pilipinas sa ginaagawan nga teritoryo.
