Nagnubo ang importasyon sang bugas sa pungsod sa una nga lima ka bulan sang tuig sa 12.55 porsyento sa tuigan nga basehan sa mga 1.9 milyones metriko tonelada, suno sa Bureau of Plant Industry.
Sa pinakaulihi nga datos sang BPI, ang importasyon sang bugas halin Enero tubtob Mayo naglab-ot sa 1.88 milyones metriko tonelada, nga nagnubo sang mga 270,000 MT gikan sa 2.15 milyones MT nga narekord sa amo man nga panahon sang nagligad nga tuig.
Ang mga importasyon sang bugas mas manubo kon ipaanggid sa numero sang nagligad nga tuig bangud sang mataas nga carry-over stocks pagkatapos nga ang pribado nga sektor nagdala sang pinakamataas nga kadamuon nga 4.8 milyones MT sang 2024.
Ginalauman man sang mga humalampang sa industriya ang mas maayo nga patubas sini nga tuig bangud sa wala sang tuman nga kondisyon sang panahon, gani naganubo ang kinahanglanon para sa imported nga stocks sang bugas.
Dugang pa, ang pagpatuman sang pinakamataas nga ginasugyot nga presyo sa tingi sa imported nga premium nga bugas makaamot sa pagnubo sang importasyon sang bugas, suno sa ginsambit sang mga humalampang sa industriya kag mga internasyonal nga mga manugpanilag.
Ang Department of Economy, Planning and Development una na nga nagbulubanta nga ang mga importasyon sang bugas sini nga tuig magalab-ot lamang sa 3.45 milyones MT, nga nagnubo sang 28 porsyento gikan sa kadamuon sang nagligad nga tuig.
Sang Hunyo 5, ang kabug-usan nga importasyon sang bugas naglab-ot sa 1.92 milyones MT, nga may tatlo ka ikaapat ukon mga 1.43 milyones MT nga naghalin sa Vietnam, ang nagapanguna nga suplayer sang bugas sa pungsod, base sa datos sang BPI.
Samtang, naglab-ot naman sa 290,680 MT ang rice imports halin sa Myanmar samtang ang halin sa Thailand kag Pakistan ang naglab-ot sa 106,350 MT kag 71,761 MT.
Nag-import man ang Pilipinas sang 19,309 MT gikan sa India, 2,000 MT gikan sa South Korea, 1,350 MT gikan sa Cambodia, 1,200 MT gikan sa Singapore, 336 MT gikan sa Japan, 0.77 MT gikan sa Italy kag 0.35 MT gikan sa Espanya.
