Ginpahayag sang Department of Agriculture (DA) nga ila pagatun-an ang posible nga pag-import sang bugas gikan sa Association of Southeast Asian Nations (ASEAN) agud makabulig nga mapabilin ang P20 per kg rice program nga gintawag nga “Benteng Bigas Meron (BBM) Na” tubtob 2028.
Ini makaligad nga nagpahayag sang kumpiyansa si Presidente Ferdinand R. Marcos Jr. sa pagpabilin sang programa, ginhinambitan sini ang target nga partnerships sa iban nga mga pungsod.
Sa isa ka press conference, ginpahayag ni DA spokesperson Assistant Secretary Arnel de Mesa nga ang nasambit nga tikang ang mahimo ipatigayon pinaagi sa Food Terminal Inc. (FTI).
Magluwas sa posible nga partnerships sa ASEAN member states, ang Pakistan kag India ang mahimo man nga ikonsiderar para sa mga kasugtanan sa ulihi agud mapabilin ang mas barato nga rice program.
Sang ginpamangkot ini nahanungod sa posible nga timeline, iya ginpahayag nga pinakatimprano ang posible sa 2026.
Suno pa kay de Mesa nga mas ukon menos 250,000 metric tons (MT) sang malapit na nga magdaan nga NFA rice ang ginpain para sa programa.
Suno sa DA, tubtob sang Mayo 20, ang NFA nakakuha na sang 8.24 million 50-kg bags sang milled rice para sa national rice buffer stock sang pungsod, nga mangin bastante sa sulod sang 11 ka adlaw.
Sa idalom sang gin-amyendaran nga Rice Tariffication Law (RTL), ang NFA kinahanglan nga mag-angkon sang 15 ka adlaw nga buffer stock bilang pagpreparar sa panahon sang mga kalamidad.
