ROXAS CITY – Magapatigayon sang pagsarado sa pila ka mga dalan ukon road closure kag traffic rerouting kadungan sa patigayunon nga Chinese New Year sa syudad sang Roxas.
Sa interview sang Bombo Radyo sa Head sang Traffic Management Unit nga si Mr. Gonzalo Andrada, ginpahayag sini nga sa Enero 27, 2025 magapatigayon sang Lion Eye Dotting Ceremony nga pagahiwaton sa atubang sang Capiz Prov’l Capitol kung sa diin magasarado ang bahin sang Taft St. nagikan sa corner Magallanes St., – corner McKinley St. sumugod alas 7:00 tubtob alas 11:00 sang aga.
Pag-abot Enero 29, may yara sang Night Market, Lotus Lantern Floating kag Live Band Entertainment nga pagahiwaton sa gihapon sa atubang sang Capiz Prov’l Capitol tubtob sa fountain kung sa diin magasugod naman sa pagsara sang dalan alas 2:00 sang hapon tubtob alas 12:00 sang maga-aga.
Bangud sini, nagahinyo si Andrada sang dako nga kooperasyon sa tanan nga mga drivers pampubliko kag pribado nga mga salakyan subong man sa mga motorista.
Samtang ginpasiguro man sini nga sa pihak sang mabug-at nga trapiko nga maeksperyensyahan sa nasambit nga mga petsa, magapahamtang ini sang mga traffic auxiliary personnel sa nagkalain-lain nga lugar agud magbulig kag maggiya sa publiko kag malikawan ang anu man nga indi pag-intindihanay.
