ROXAS CITY – Posible nga pagasugudan sa una nga semana sang Nobyembre ang road construction sa pila ka mga kabarangayan sa tagsa ka banwa sa Capiz.
Ini ang ginpahayag ni Mr. Weldie Apolinario, Consultant for Infrastructure Project sang ma-interview sang Bombo Radyo.
Suno kay Apolinario, subong nga adlaw ginapatigayon ang bidding sa provincial capitol kun sa diin magapili sang contractor nga magatrabaho sang nasambit nga proyekto kag pagakuhaon ang pondo gikan sa 20% development fund.
Samtang wala pa sang contractor, padayon naman sa karon ang pagpatigayon sang road rehabilitation partikular sa banwa sang Panitan.
Ginsiling ni Apolinario nga may yara na sila nakay-o sa banwa sang Pilar, Pontevedra, Dumalag, kag Maayon nga mga kinahanglan unahon kag sa karon ginatutukan naman nila ang ginapatigayon nga road rehab sa pila ka barangay sa Panitan.
Dugang pa ni Apolinario nga prayoridad sa sini nga proyekto ang mga karsadahon sa mga banwa sang primero distrito kag provincial roads.
Luyag pa suno diri ni Governor Fredenil “Oto” Castro nga antes magsaylo sa isa ka banwa, tapuson anay ang isa ka banwa agud mangin maayo tanan ang alagyan sang mga pumuluyo.
Ginapalab-ot ni Apolinario sa pumuluyo nga pagatutukan nila ini sang maayo agud mangin maayo ang transportasyon kag pagbiyahe sang tanan.
