ROXAS CITY – Balik operasyon na ang Roll on kag Roll off trips sa probinsya sang Capiz.
Ini base sa ginpaguwa nga advisory ni Capiz Governor Esteban Evan Nonoy Contreras sadtong Nobyembre 28, 2020.
Ini ang ginkompirmar ni Atty. Atlas Catalan, Information Officer sang gobyerno probinsyal sang mainterview sang Bombo Radyo.
Suno kay Catalan nga may yara sang mga kinahanglanon nga mga rekisitos nga dapat ma-comply sa pag-avail sini amo ang Identification Card ukon ID’s nga nagapamatuod nga residente sang probinsya, Medical Clearance/Certificate, Letter of Acceptance nga magahalin sa tagsa ka mga Local Government Units (LGU’s) kag Travel Authority nagikan sa Philippine National Police (PNP).
Magluwas diri, gina-obligar man nga mag preparar ang mga drivers sang mga roro buses sang passenger of manifest ukon listahan sang mga pangalan sang mga pasahero.
Ginpahayag man ni Catalan nga duha lamang ang mga unloading areas nga gindesignar para sa pagpanaog sang mga pasahero.
Dugang pa sini nga hugot man nga ginadumilian ang pagpasakay sa mga pasahero nga may yara sang nabatyagan nga sintomas sang COVID-19 kag pagpanaug sa mga pasahero bisan sa diin nga lugar.
Mahibaluan nga sa Capiz Villareal Stadium magapanaog ang mga pasahero sang 1st district samtang sa Mambusao Central Terminal naman ang mga pasahero sang 2nd District kun sa diin padayon ang assessment kag pag-akomodar sang ila tagsa ka mga LGU’s.
Samtang, padayon sa gihapon ang panugyan sang gobyerno probinsyal nga magsunod sa nagakaigo nga mga minimum health protocols agud hilway kag malikawan ang pagdamo sang kaso sang COVID-19 sa probinsya.
