ROXAS CITY – Lauman ang mataas nga lebel sang seguridad sa Roxas Airport subong nga Disyembre para sa Christmas kag New Year.
Sa interview sang Bombo Radyo kay PLt. Jose Dexter Paulin, Officer-in-charge sang Roxas Airport Police Station, iya ginpahayag nga aktibo na ang “Oplan Ligtas Paskuhan 2025” agud masiguro nga safe ang kada traveler sa Capiz kadungan sang masako nga tyempo sang tuig.
Suno kay Paulin, maid-id nga gina-check sang aviation security group ang tanan nga bahin sang airport, halin sa entrance gates tubtob sa check-in areas.
Mahinalungon man nga gina-check ang bags, carry-on ukon checked luggage agud mapunggan ang pagbitbit sang mga delikado nga items nga makasulod sa eroplano.
Nagapanawagan ang natungdan sa kada traveler nga sundon ang isa ka mayor nga rule agud mangin smooth ang trip , mag-abot sang timprano sa airport kag palabaon ang pasensya.
