ROXAS CITY, CAPIZ – Ginsiguro sang Roxas Airport Police ang seguridad sang magapadulong agud magbyahe para sa tigkalalag.
Sa interview sang Bombo Radyo kay Police Lieutenant Jose Dexter Paulin, Officer-in-charge sang Roxas Airport Police Station, iya ginpahayag nga nakared-alert status ang tanan nga unit sang talatapan nga ginpang-deploy sa nagkalain-lain nga bahin sang paluparan.
Suno kay Police Lieutenant Paulin, gin-doble na ang security measures sa paluparan ilabi na ang bahin nga may madamu nga tawo kasubong ang parking area kag waiting area agud malikawan ang mga insidente.
Pahayag pa niya, ginlunsyar man ang ‘Oplan: Pamasaheng Tapat’ kun sa diin hugot nga ginabantayan ang mga nagabyahe nga tricycle kag taxi sa paluparan agud malikaw sa sobra nga pagpanukot ang mga pasahero.
Nagpanawagan man ang natungdan, nga mangin aligmat sa mga gamit kag kun mahimo, indi na magdala sang mga ginabawal agud indi ma-disturbo ang pagbyahe.
Interviewed by: Bombo Francis Biñas via Zona Libre
