Nagpakigbahin ang Roxas City Component Police Station sang mga accomplishment sang ila talatapan humalin bulan sang Setyembre tubtob Oktubre 11 sa subong nga tuig 2025.
Sa interview sang Bombo Radyo kay Police Major Aldren Almera, Deputy Chief sang Roxas City Component Police Station, iya ginpakigbahin ang mga accomplishments sang ila nga talatapan agud mapabilin ang kalinong kag katawhay sang palibot.
Ang mga accomplishment ang resulta sang nagkalain-lain nga kampanya nga ginpatigayon sa amo nga panahon.
Sa kampanya batuk iligal nga druga ukon ang paglapas sa Republic Act 9165, may yara sang ginpatigayon nga 3 ka buy-bust operation kag 2 pa ka iban pa nga operation kun sa diin may nadakpan nga 5 ka persona kag may nakuha nga 17.124 grams sang iligal nga druga nga may street value nga P133,749.
Sa kampanya batuk sa pag-aresto sang mga wanted person, may yara sang nadakpan nga 7 ka wanted person sa bulan sang Setyembre kag 2 sa bulan sang Oktubre kun sa diin ang isa ang ginakabig most wanted person nga may kaso nga murder.
Sa kampanya batuk sa mga loose firearms ukon paghupot sang iligal nga armas-luthang, sa bulan sang Seytembre may yara sang isa ka caliber 45 nga gin turnover kag isa man ka armas-luthang ang gin turnover sa bulan sang Oktubre.
Sa kampanya batuk sa illegal gambling ukon iligal nga pagsugal, may yara sang 3 ka ginpatigayon nga 3 ka operarion kun sa diin may 3 man ka naaresto kag nakuha nga kwarta nga balor P3,410.
Pag-abot naman sa seguridad, ginapalig-on sang Roxas City Component Police Station ang police visibility sa pamaagi sang paglibot sang mga patrol kag pagpahamtang sang mga substation sa Barangay Loctugan, Barangay Cagay, Barangay Inzo kag Barangay Baybay agud mas malapit sa mga pumuluyo ang pagpalapit sa mga katapo sang kapulisan.
Pahayag pa niya, nagatutok gid ang ila talatapan sa pagpanikasog nga mabantayan ang pila ka mga insidente sang kinawatay sa syudad kag nagahingyu nga kun mahimo magdiretso sa kapulisan agud magpabalhag sang reklamo antes nga magpost sa mga social media agud gilayon nga ma-aksyunan.
Dugang pa sang natungdan, magapadayon ang ila nga pagserbisyo sang kapulisan kaupod ang kooperasyon sang mga kabarangayan kag mga pumuluyo agud mapabilin ang katawhay kkag kalinong sang bug-os nga syudad sang Roxas.
