Ginpataas sang roxas city emergency operations center sa Code red ang alert status sang syudad sang Roxas bangud sa bagyo Uwan.
Buot silingon, yara sa full emergency ang syudad kag kinahanglan nga mangin alerto ang publiko, handa nga mag evacuate kag hugot nga nagasunod sa mandu sang local government.
Nagtaas ang lebel sang tubig sang dagat sa pila ka mga barangay sa syudad mangin sa pila ka mga banwa. Nabatyagan ang mabaskog nga huyop sang hangin kag hampak sang balod sa mga baybayon.
Madamu sang mga pumuluyo ang nag-evacuate ilabi na sa mga coastal barangays lakip na ang Barangay Cogon, Barra, Culasi,Dumulog kag Baybay sa syudad sang Roxas.
Ginpangunahan mismo ni Roxas City Mayor Ronnie Dadivas ang pag-rescue sa mga pumuluyo kaupod Emergency Response Team bangud kadam-an sa coastal areas ang ginsulod na sang tubig dagat ang ila balay.
Samtang, pila man ka banwa sa probinsya sang Capiz ang nakabatyag man sang mabaskog nga hampak sang balod kag pagtaas sang lebel sang tubig.
Sa banwa sang Pilar, nag-awas ang tubig-dagat sa bahin sang fishport rason nga madamu sang mga panimalay ang ginsulod sang tubig.
Sa banwa sang Panay, may pila man ka mga balay malapit sa baybay ang naguba bangud sa hampak sang balod tuga sang mabaskog nga hangin kag pagtaob. Nag-awas man tubob sa dalan ang tubig dagat bangud sa high tide.
Nahibaluan nga base sa weather bulletin sang PAGASA ‘las 5 subong nga aga, yara sa gihapon sa tropical cyclone wind signal no. 1 ang bilog nga probinsya sang Capiz bangud sang nasambit nga bagyo.
Sa subong, padayon ang pag monitor sang mga awtoridad kag ginapahanumduman ang tanan nga mangin-aligmat kag alerto bangud sa malain nga panyempo.
