ROXAS CITY – All-set na ang Roxas City Government para sa palaabuton nga Sinadya Festival.
Sa interview sang Bombo Radyo kay Roxas City Mayor Atty. Ronnie Dadivas, iya ginpahayag nga madayon ang nasambit nga festival apisar sang asud-asud nga bagyo nga nag-agi sa syudad sang Roxas sang nagliligad nga semana.
Suno kay Mayor Dadivas, ang Sinadya Festival ang sadtu anay ginatawag nga “Sinadya sa Halaran” apang ginhimo ini nga duha ka selebrasyon nga subong ginatawag ang Capiztahan sa bulan sang Abril kag ang Sinadya Festival sa bulan sang Disyembre.
Pahayag pa niya, ang ini nga selebrasyon ang naka-focus sa kapistahan sang Immaculada Conception, ang patron sang syudad sang Roxas.
Dugang pa niya, madamu sang mga pagahiwaton sang event kaangay sang coronation sang Mutya sang Roxas City, sinadya jobfair, Sadsad sa Sinadya, sports fest,tambi-palad ukon mass wedding, christmas tree lighting, opening and blessing of city projects kag konsyerto kaupod ang mga dinapit nga mga bisita.
Samtang, magapatigayon naman sang fluvial parade sa suba kag misa sa mismo nga kapistahan sang Immaculada Conception sa December 8, 2025.
Gina-imbitar man sang natungdan ang tanan nga magtambong sa palaabuton nga Sinadya Festival agud indi lang makit-an ang katahom sang syudad sang Roxas, amo man ang pagka-hospitable sang mga Roxasnon.
Interviewed by: Bombo Chris Jan Lozada via Zona Libre
