Nagpatigayon sang emergency meeting ang gobyerno sang syudad sa mga barangay kapitan kag opisyales sang barangay agud makadihon sang istratehiya para matapna ang pagtaas sang kaso sang COVID-19, karon nga ginpalawig pa sang 15 diyas ang pagpaidalum sa Roxas City sa Modified Enhanced Community Quarantine (MECQ).
Ginpahayag ni Mr. Ronald Amigo – COVID-19 command center executive director may improvement sa mga istratehiya nga nahisugtan nga patigayunon kasubong sa pagpasangkad kag mas istrikto nga pagpatuman sang mga barangay kag border checkpoint, pagtsekyar kun ginasunod sang mga nagapasulod sa ila barangay ang minimum health protocols, istrikto nga pagmonitor sa mga ginapaidalum sa home quarantine, pagbakal sang oxygen para sa mga kabaranggayan nga sarang gamiton sang mga indibidwal nga naka-home quarantine kun kinahanglanon.
Kumpyansa si Amigo nga mapanubo ang COVID-19 cases sa syudad sa sulod sang duha ka semana nga ginpalawig ang quarantine status sang Roxas City, bangud sa mga bag-o nga istratehiya nga ipatuman.
Daku ang papel sang mga pumuluyo sa kampanya sang gobyerno batuk sa COVID-19 bangud pinaagi sa suporta kag kooperasyon sang publiko sa mga ginahimo nga lihok sang gobyerno matigayon nga mapanubo ang kaso amo nga balatian.
Apang talalupangdon ang mga pasaway nga mga indibidwal humalin sang Hunyo 1 sang ginpaidalum sa MECQ ang Roxas City, masobra sa isa ka libo ang mga violators nga naglapas sa health protocols.
Ginpanindugan pa ni Amigo nga kinahanglan ang mapalawig ang MECQ sa syudad bangud puno na ang tanan nga mga health facilities.
Padayon ang distribusyon sang bugas sang gobyerno sa mga pumuluyo kasunod sang extension sang MECQ kag foodpacks kag ayuda sa mga apektado sang COVID-19 nga yara sa ila mga balay.
Samtang na-obserbahan ni Amigo nga sini nga bulan sang Hunyo, naganubo ang edad sang mga indibidwal nga nagkalamatay bangud sa COVID-19.
Bangud diri liwat nag-apelar ang opisyal sa mga pumuluyo nga kun indi man lamang importante ang kaladtuan, magtenir na lamang sa ila mga balay agud malikawan ang paglapta sang COVId-19.
