ROXAS CITY – Ginkasugtan nga mapapasar ang pagre-align sang nabilin nga pondo sang Department of Education (DepEd) Local School Board para sa school year 2020-2021 agud masuportahan ang himuon nga blended kag online learning sa pagbukas sang klase bangud sang coronavirus disease (COVID-19) pandemic.
Ini ang nahinalaan sa LSB session nga ginpangunahan ni LSB Chair kag Roxas City Mayor Ronnie Dadivas kaupod ang co-chair nga si Dr. Cian Buenafe, ang City Schools Division Superintendent.
Kalakip sa proyekto nga pagapainan sang pondo amo ang pagtukod sang TeleRadyo Station para sa DepEd Roxas City, pagbakal sang gadgets para sa mga manunudlo kag estudyante nga nagakinahanglan kag subscription sang online Learning Management System (LMS) sa tanan nga eskwelahan sa siyudad.
Pagagamitan man sang pondo ang pagpaayo sang internet signals sa pila ka mga far flung barangays sa Roxas City.
Plano naman sang DepEd nga mag-apelar sa gobyerno-nasyunal nga pahanugutan ang local government unit (LGU) nga magamit ang Special Education Fund para sa mga proyekto nga kinahanglan sa new normal educational standard.
