Pagkatapos sang lima ka oras nga negosasyon sa tunga sang mga negotiator sang sang Estados Unidos kag Russia, ang duha ka bahin napaslawan sa paghimo sang isa ka breakthrough sa Ukraine peace plan.
Suno kay Kremlin spokesman Dmitry Peskov, nangin mabinungahon ang pagsinapol, apang ang pila ka bahin sang plano wala gihapon ginabaton sang Russia.
Ginpahayag naman sang senior aide ni Russian President Vladimir Putin nga si Yuri Ushakov nga yara sa sinapol sa Moscow, nga wala pa sila nakalab-ot sa isa ka kasugtanan, gani nagsiling siya nga madamo pa sang dapat himuon.
Pila sa mga indi paghangpanay sa tunga sang Moscow kag Kyiv amo ang pagbato sang Ukraine sa paghatag sang ila teritoryo nga padayon sini nga ginakontrol kag ang mga security guarantees nga ihatag sang Europa.
Lakip sa mga nagtambong sa sinapol amo ang US Special envoy to the Middle East nga si Steve Wikoff kag umagad nga lalaki ni US President Donald Trump nga si Jared Kushner nga wala pa sang komento humalin sang nagbiya sa Moscow pagkatapos sang negosasyon.
