Narekober sang mga otoridad ang isa ka sako nga may unod nga mga tul-an nga pagahibaluon pa kun tawo ukon sapat ini sang Huwebes sang hapon sa Taal Lake.
Suno sa Department of Justice (DOJ), narekober ang mga tul-an samtang nagapatigayon sang inspection ang Philippine Coast Guard (PCG) sa nasambit nga lake para sa ila plano nga surface assessment.
Ini nga mga tul-an ang ipaidalom sa DNA test agud mahibaluan kon bala nagasantu ini sa isa sa mga nadula nga mga manugbulang.
Una na nga ginpahayag sang Philippine Coast Guard (PCG) nga sang Biyernes, sugdan na nila ang pormal nga pagpangita sa mga bilin sang mga nadula nga sabungero kun indi maglain ang kondisyon sang panahon.
Una na nga gin-anunsyo ni Justice spokesperson Mico Clavano nga kumpyansa ang departamento nga makuha pa ang mga bangkay kun ginhaboy sa Taal Lake ang mga nadula nga sabungero sang 2021 kag 2022.
Samtang, padayon pa ang imbestigasyon kun may kaangtanan ini sa kaso sang nadula nga mga sabungero.
