ROXAS CITY – Wala nagsunod sa instakto nga pagsulundan sa gintan-ay nga livelihood program ang San Esteban Farmers Association (SEFA).
Sa interview sang Bombo Radyo kay Ms. Macky Medina Labor Employment Officer 3, ginpahayag sini nga antes pa man ginhatag sa ila asosasyon nahinalaan na kag nakasugtanan ang mga dapat kag indi dapat pagbuhaton sa pagdumala sang amu nga programa.
Gani amu na lamang ang ila pagkasubo kag pagkadismaya sang mahibaluan, ang natabo sa SEFA kung sa diin ginapahayag nga ginpautang ang mga produkto kag magluwas pa diri ang cash nga kita sang balaligyaan nga hugot ginadumilian ilabi na kung nagasugod pa lamang ini rason nga ginpakamaayo na lamang nga ipasarado.
Matandaan, personal nga nagpadulong sa talatapan sang Bombo Radyo ang Bise Presidente kag Sekretarya sang SEFA agud ireklamo ang Presidente sang ila asosasyon kung sa diin ginpetisyunan pa nga mapapanaog sa pwesto matapos sa indi maayo sini nga pagdumala.
Suno kay Medina, magapadulong ang DOLE Capiz sa San Esteban, Pilar agud istoryahon ang mga miyembro sang nasambit nga asosasyon kag ipaathag kung anu nga mga pagsulundan ang ila mga ginsuway kag kinahanglan nga himuon.
Apang pananglitan nga indi ang mga ini magkasugot suno kay Medina, may posibilidad suno diri nga mabawi sa ila ang programa kag mahimo nga indi na sila makaganar liwat.
Samtang nagalaum man ini nga kun tani masolusyunan pa kung anu man ang nangin problema sang amu nga asosasyon, bangud nagapati ini nga ang tanan nga indi pag-intindihanay madala sa maayo nga paghinala.
