Gin-abswelto sang Sandiganbayan si anay Bise Presidente Jejomar Binay kag ang anak sini nga si anay Makati Mayor Junjun Binay sa kaso nga graft, falsification of public documents, kag malversation of public funds may kaangtanan sa kontrobersyal nga P2.2 bilyones nga proyekto sang Makati City Parking Building.
Suno sa Third Division sang Sandiganbayan, napaslawan ang prosekusyon nga pamatud-an ang sala sang mga akusado “beyond reasonable doubt” kag gin-abswelto sila.
Lakip sa desisyon ang pag-lift sang Hold Departure Order batuk sa mga Binay kag iban pa nga mga akusado.
Wala man sila ginpasakaan sang kaso nga civil liability bangud sa kakulang sang bastante nga ebidensya.
Ginpasakaan sang kaso si anay VP Jejomar Binay sa una nga bahin sang proyekto sang siya pa ang alkalde sang Makati.
Samtang si Junjun Binay ang ginpasakaan sang kaso sa ulihi nga bahin sang proyekto, lakip na ang mga kontrata nga ginaalegar may kakulangan sa dokumentasyon kag performance security.
Ini nga mga kaso ginpasaka sang 2016, pagkatapos sang termino ni Binay bilang bise presidente sang pungsod.
