Ginpanindugan sang bilyonaryo nga kontraktor nga si Sarah Discaya nga wala siya nagahatag sang kickbacks ukon porsyento sa Department of Public Works and Highways (DPWH).
Sa ginhiwat nga hearing sang Senate Blue Ribbon Committee, ginpamangkot ni Sen Jinggoy Estrada ang bilyonaryo nga negosyante kon pila ang porsyento nga ginahatag niya sa mga opisyales sang Department of Public Works and Highways (DPWH) kada makakuha sang kontrata ang iya mga kompaniya sa gobyerno.
Apang, nanindugan si Discaya nga wala siya nagahatag sang porsyento. Magluwas diri, ginpahayag niya nga wala man ini naga-transaksyon sa mga kontrata nga ginsulod sang iya mga kompaniya.
Ginpaandaman man ni Sen. Estrada ang negosyante nga kun mapamatud-an nga nagabinutig ini, mahimo ini mapreso bangud nagsumpa ini antes maghambal sa Senate hearing.
Pahayag sang contractor, naga-agi sa legal nga proseso ang ila mga kontrata.
Nahibaluan nga ang mga kompaniya nga ginapanag-iyahan sang pamilya Discaya ang nakakuha sang pila ka dalagko nga kontrata sang gobyerno para sa flood control kag iban pa nga pampubliko nga proyekto sa imprastraktura sang gobyerno.
