Pormal na nga ginpasakaan sang panumbungon ang pila ka mga opisyal sang Department of Public Works and Highways sa Davao Occidental kag pila ka mga kontraktor kalakip na si Sarah Discaya.
Ini na ang ikaduha nga ‘major case’ nga ginpasaka sang Office of the Ombudsman sa korte santo sa tuyo nga pasabton ang mga involved sa flood control scandal.
Suno kay Assistant Ombudsman Mico Clavano, magapasaka sila sang panibag-o nga kaso matapos nga makatipon sang bastante nga basehan agud mapasakaan sang kaso ang mga involved.
Ini ang may kaangtanan suno sa iya sa natukiban nga ‘ghost flood control project’ sa Davao Occidental nga ginhatagan sang award sang tuig 2022 sa diin nagabalor sang 96.5 milyones pesos.
Lakip man sa mga respondents sang kaso ang duha ka pribado nga indibidwal nga sanday Roma Angeline Rimando kag Sarah Discaya, tag-iya sang St. Timothy Construction Corporation.
Partikular nga mga panumbungon nga ginpasaka sang Ombudsman batok sa ila amo ang ‘Malversation of Public Funds through Falsification of Public Documents’ kag paglapas sa Section 3(e) sang Republic Act 3019 ukon Anti-Graft and Corrupt Practices Act.
