ROXAS CITY – Tuman ka importante ang School Based Feeding program sang Department of Education (DepEd) Capiz Schools Division agud masolusyunan ang problema sa malnutrilyon sa mga estudyante sa pampubliko nga buluthuan sa probinsiya sang Capiz.
Ginpahayag ni Sheralyn Baticados, ang Division School Based Feeding Coordinator sang Capiz DepEd Division, tinutuyo sang programa sang ahensiya nga mahatagan sang awareness ang tanan angut sa ka-importansiya sang nutrisyon sa mga Pilipino, partikular sa mga estudyante kag matapna ang malnutrisyon.
Suno pa kay Baticados nga tuman ka importante nga mangin well nourished ang bata agud mangin aktibo ini sa pagpartispar sa leksyon sang ila mga manunudlo.
Ginasigurado man sang mga manunudlo nga tanan nga pagkaon nga ginpreparar para sa feeding program sang mga kabataan ang masustansiya kag napun-an sang bitamina kag mineral.
Positibo man si Baticados nga sa pagtakup sang programa tanan nga mga kabataan nga nangin kabahin sini ang magadugang ang ila nga kabug-at kag indi na mangin malnourished.
Samtang suno naman kay Candelaria Talabucon, division nutrition coordinator nga tanan nga pagkaon nga ginapreparar para sa feeding program ang may lakot nga malunggay, sa diin ginakabig ini nga powerful vegetable bangud may yara ini sang vitamin A-Z nga kinahanglanon sang mga kabataan.
