CAPIZ– Ginapasangkad sang Department of health-Capiz ang school-based immunization sa bug os nga probinsya sang Capiz subong nga Agosto tubtob Sptyembre.
Sa Interview sang Bombo Radyo Roxas kay Mr. Jeoffreey Espiritu, Information Officer sang DOH Capiz, ginpahayag nga ginlunsyar ang nasambit nga programa sa tanan nga pampubliko nga eskwelahan sa bug os nga rehiyon kag Local Government Unit (LGU) sang probinsya sang Capiz.
Suno sa iya, katuyuan sang aktibidad nga mapanindugan sang DOH ang ila responsibilidad sa paghatag sang proteksyon sa mga kabataan sa probinsya Pagabakunahan sang Measles, Rubella, Tetanus, Diphtheria vaccines ang tanan nga grade 1 learners sa amo nga buluthuan.
Samtang ang grade 4 nga mga babaye nga estudyante ang gintublukan sang Human Papilloma Virus (HPV) vaccines.
Dugang pa sini, magalawig ang School-Based Immunization program sa mga pampubliko nga lugar sa probinsya tubtob Septyembre.
Magluwas sa Grade 1 learners, Measles-Rubella vaccines naman ang bakunahan ang mga grade 7 nga mga estudyante nga enrolled sa tanan nga pampubliko nga eskwelahan.
Gin-athag ni Mr. Espiritu nga safe, effective kag libre ang vaccine nga igabakuna sa mga kabataan.
Ginapa-agi man sa screening ang isa ka estudyante kag kinahanglan lang suno sa iya nga busog ang bata antes ini nga bakunahan.
Panawagan ni Espiritu sa mga ginikanan kag mga bantay sang mga estudyante sa paghatag sang ila pahanugot sa mga vaccines agud mapasangkad ang ila kampanya batuk sa mga balatian kag mapasiguro ang proteksyon sang mga kabataan.
