Dakop sa drug buy-bust operation ang isa ka public school principal sa Purok 3, Barangay Poblacion, Tagbina, Surigao del Sur.
Ang joint operation ang gin-updan sang Philippine Drug Enforcement Agency Regional Office 13kag sang Tagbina Municipal Police Station.
Ang suspek ang isa ka 45 anyos nga lalaki, residente sang nasambit nga lugar kag nagaserbe bilang district school supervisor nga may rank nga Principal III.
Suno sa mga imbestigador, madugay na nga gina-surveillance ang suspek bangud sa ginaalegar involvement sini sa illegal drug activities.
Natigayon ang buy-bust matapos ang validation kag monitoring sang nagkalain-lain nga anti-drug units.
Nakuha sa operasyon ang duha ka plastic sachets nga ginapatihan shabu nga may balor nga P6,800 kag marked money nga gingamit sa transaksyon.
Sa subong, yara na sa kustodiya sang Tagbina police ang suspek kag magapangatubang sang kaso nga paglapas sa Comprehensive Dangerous Drugs Act of 2002.
