ROXAS CITY – Patay ang isa ka principal matapos nga ginbuno sang wala pa nahingadlan nga suspek samtang yara sa sulod sang iya apartment sa Green Earth Subdivision, Barangay Mongpong, Roxas City takna 1:55 sang kaaganhon, Agosto 16.
Ginkilala ang biktima kay Jun Mencedez, 56-anyos, principal sang Minoro Elementary School kag residente sang nasambit nga lugar.
Sandig sa imbestigasyon sang Roxas City PNP, naga-inom-inom ang biktima kaupod ang iya abyan nga si Alvin Aniero kag isa pa ka persona, wala nagdugay naghalin sa apartment si Aniero rason nga nabilin ang duha sa amu nga apartment.
Sang hinali nga nakabati sang nagapangayo sang tabang ang mga persona nga nagapuyo sa kaiping nga apartment kag ginpadulungan ang lugar sang principal kun sa diin nakit-an sini ang bata sang biktima nga nagahilibion samtang yara sa salog ang iya amay nga nagapaligo sang dugo kag may buno sa magkatuhay nga parte sang lawas.
Madasig nga nagresponde ang RCERT kag ginpadangat sa Health Centrum Hospital apang gindeklarar nga dead on arrival sang doktor.
Narekober sa ginluntaran sang insidente ang isa ka gunting kag itom nga kalo.
Sa karon, padayon ang imbestigasyon sang kapulisan angut sa insidente.
