PARIS, France — Nagpaandam ang kapin 70 ka scientist sa padayon nga nagalala ang pag-init sang kalibutan kag nakarekord sang bag-o nga hagna natuhoy sa climate indicators nga nagapakita sang epekto sang climate change.
Base sa bag-o nga pagtuon, naglab-ot sa 1.39 degrees Celsius ang average nga global temperature sang 2025 kompara sa pre-industrial nga panahon, kag halos tanan sini ukon 1.37 degrees Celsius ang ginatudlo nga resulta sang mga aktibidad sang tawo.
Suno sa eksperto nga malab-ot ang 1.5 degrees Celsius nga human-induced warming sa palibot sang tuig 2030 kon magapadayon ang kasamtangan nga trend sang pag-init sang kalibutan.
Pahayag pa sang scientist, nagrekord man ang pinakadaku nga lebel sang greenhouse gas kag carbon dioxide emissions nga amo sa gihapon ang nagapanguna nga kabangdanan sang global warming.
Ginpahayag man sang natungdan nga kon magapadayon ini nga sitwasyon, mahimo nga maubos ang nabilin nga carbon budget sang kalibutan sa sulod lamang sang tatlo ka tuig.
Sa pagsaka sang lebel sang dagat sang mga 23 sentimetro halin sang 1901 tubtob 2025 bangud sang padayon nga pagkatunaw sang yelo kag pag-init sang kadagatan.
Samtang, ang average nga bilang sang marine heatwave days sang 2025 naglab-ot sa 65 ka adlaw, ukon sobra tatlo ka beses nga mas mataas kompara sa narekord sang 1991.
Nagpakita man ini sang kabalaka sa scientist sa paganubo sang pondo para sa climate monitoring programs kag sa posible nga pagnubo sang satellite kag ocean observation systems, ilabi na sa Estados Unidos.
Ginalauman nga mapadayon ang pagpondo kag pagpalig-on sang sini nga sistema bangud amo ini ang nagahatag sang kritikal nga datos para sa pagmonitor sang pag-init sang kalibutan kag sa paghibalo sang mga epekto sini sa panahon.
