PRESIDENT ROXAS, CAPIZ- Nagapadayon ang ginapatigayon nga search and rescue operations sa isa ka manugpangisda nga ginapahayag nadula sa banwa sang President Roxas, Capiz, kadungan sang pag-igo sang Bagyo Tino sa probinsya.
Ang manugpangisda amo si Sherwin Banton Jabonete, 41 anyos kag residente sang Barangay Pinamihagan, President Roxas, Capiz.
Sa interview sang Bombo Radyo kay Police Major Alfred De Leon, Hepe sang President Roxas Municipal Police Station, iya ginpahayag nga apat tanan ka mga bangka ang sa subong nga naga-roving sa kalalawran sang President Roxas, Pontevedra, Panay kag Pilar.
Kalakip sa mga nagapatigayon sang operasyon ang mga katapo sang kapulisan, Philippine Coast Guard, Bureau of Fire Protection, Municipal Disaster Risk Reduction and Management Council kag iban pa.
Suno kay De Leon, nagaguwa sa ila nga pagpangusisa nga nagpalawod si Jabonete sang pagsulod sang Bagyo Tino, sa diin nga ginpaidalom ang probinsya sa Tropical Cyclone Wind Signal No. 1.
Pahayag nya, may pila man ka manugpangisda pa nga yara sa kalayuon 100-200 meters ang nakakita sa kay Jabonete nga naglumpat halin sa iya bangka kag ginapahayag nga alsahon ang tangaban (kawayan nga may net) sini halin sa dagat apang, dugang pa sang mga nakakita, wala na kabutwa ang amo nga manugpangisda.
Nahibaluan nga pati ang pamilya ni Jabonete nag-upod man sa search and rescue operation nga dala ang hugot nga paglaom nga makit-an ini nga may kabuhi pa.
Magapatigayon ang nasambit nga operasyon myentras nga wala pa sang mandu halin sa ibabaw nga untanon na ini.
Nagapanawagan naman si De Leon sa mga pumuluyo, ilabi na sa mga manugpangisda, nga indi gid magpalawod kun malain na ang hulag sang dagat agud nga makalikaw sa kasubong nga insidente.
Interviewed by Bombo Sunnie Mae Constantino Batencila
