FRANCE-Nakapatay sang ginabulubanta nga 1.66 milyon ka tawo sa bilog nga kalibutan ang second-hand smoke ukon aso sang sigarilyo sang iban nga tawo sang 2023, suno sa isa ka pagtuon nga ginpublish sa The Lancet.
Suno sa pagtuon, kapin 2.7 bilyon ka tawo ang nalantawan sa second-hand smoke sang amo nga tuig, lakip ang 767 milyon ka kabataan nga nag edad zero tubtob 14 anyos.
Ginpahayag sang mga researcher nga ang second-hand smoke isa ka seryoso nga peligro sa ika-lawas kag wala sang safe level sang paglanghap sini.
Ang exposure sa second-hand smoke gin-estimar nga nakaresulta sa 1.66 milyon ka wala pa sa tion nga kamatayon, lakip ang mga kaso sang ischemic heart disease ukon sakit sa tagipusuon nga nagakatabo bangud kulang ang oxygen nga nagaabot sa heart muscle.
Sa mga kabataan naman, gin-estimar nga nakaresulta ini sa 5.2 milyon ka kaso sang respiratory tract infections sang 2023.
Ginpahayag man sang pagtuon nga ang mga tawo nga yara malapit sa nagapanigarilyo nalantawan sa aso nga nagahalin mismo sa nagadabdab nga sigarilyo kag sa aso nga ginagwa sang nagapanigarilyo. Ang sini nga aso may yara sang makahilo kag cancer-causing nga mga kemikal.
Bisan pa nga nagpanubo ang smoking rate sa bilog nga kalibutan halin 1990, nagpabilin nga mataas ang kadamuon sang mga tawo nga nalantawan sa second-hand smoke bangud sa pagdamo sang populasyon kag pagsaka sang exposure sa pila ka rehiyon.
Gani, ginapanawagan sang mga researcher ang mga gobyerno nga palig-unon ang mga tikang batok sa paggamit sang tabako sa mga pampubliko nga lugar kag sa mga puluy-an agud maprotektahan ang mga indi nagapanigarilyo, ilabi na ang mga kabataan kag kababayen-an, batok sa peligro sang second-hand smoke.
