ROXAS CITY – Dead on arrival nga ginpadangat sa Bailan District Hospital ang isa ka security guard matapos nga ginluthang sang makaapat ka beses, takna 5:43 sang hapon, Oktubre 10 sa Barangay Ibaca, banwa sang President Roxas.
Ginkilala ang biktima kay Tio Garcia, 47-anyos, security guard sa East Elementary School, samtang ang suspek ang ginkilala kay Keyn Almendral, 24-anyos, lunsay mga residente sang nasambit nga lugar.
Sandig sa imbestigasyon sang Pres. Roxas PNP, nakabaton ini sang report nga may yara sang pagpangluthang nga natabo sa amu nga lugar kun sa diin madasig naman ini nga ginpadulongan sang mga imbestigador kag naabtan ang biktima nga nagapaligo sa kaugalingon nga dugo.
Ba-se kay Pemar Garcia, bata sang biktima kag nakasaksi sang natabo, ginsiling sini nga ginluthang sang makaapat ka beses ang iya amay gamit ang indi pa matumod nga armas-luthang kun sa diin na-igo ini sa ulo kag magkatuhay nga parte sang lawas.
Ginpadangat pa ini sa ospital apang gindeklarar nga dead on arrival sang doktor.
Samtang, madasig naman nga nagpalagyo ang suspek matapos ang pagpangluthang sakay sa motorsiklo padulong sa banwa sang Pilar.
Gilayon naman nga naghiwat sang hot pursuit operation ang mga kapulisan kag natigayon nga madakpan ang suspek takna 9:00 sa gab-i sa Brgy. Cayus banwa sang Pilar.
Padayon ang imbestigasyon sang kapulisan kag ginahibalo ang motibo sa pagpangluthang kay Garcia.
Sa karon, yara na ini sa kustodiya sang Pres. Roxas MPS para sa nagakaigo nga disposisyon.
