ROXAS CITY, CAPIZ- Patay ang isa ka security guard sa Roxas City Airport, Barangay Baybay, Roxas City, matapos nga ginbuno sang kaupod man nga security guard.
Ang biktima amo si Orbe, 45-anyos kag residente sang Brgy. Cagay, Roxas City, samtang ang suspek naman amo si Willy Maligdong, 34-anyos kag residente sang Brgy. Tinigban, Panitan, Capiz.
Sa interview sang Bombo Radyo kay Police Staff Sergeant Almar Albaran, Imbestigador sang Philippine National Police Aviation Security Group sa Roxas City Airport, iya ginpahayag nga base sa ila nga imbestigasyon, nagwa nga may nagluntad nga indi pag-intindihanay sa tunga sang biktima kag suspek pinaagi sa chat.
Suno kay Albaran, ginpatawag sang biktima ang suspek sa gate sang airport kag sang nag-abot na ang suspek sa lugar, hinali nalang ini nga ginlampusan sa ulo sang matig-a nga butang.
Apang, natukiban nga may dala nga kutsilyo ang suspek kag ginbuno ang biktima sang makaduha ka bes sa likod nga nawala nga porsyon sang iya lawas.
Bangud sa natabo, nag-angkon sang pilas ang biktima nga gilayon ginpadangat sa ospital apang samtang ginabulong, ginbawian ini sang kabuhi.
Samtang, gilayon man nga gindakop sang mga kapulisan ang suspek nga nagapangatubang sa kaso nga homicide.
Sa subong, nagapabilin ini sa kustodiya sang Roxas City Police Station para sa nagakaigo nga disposisyon.
Interviewed by Bombo Sunnie Mae Constantino Batencila
