ROXAS CITY – Nakahanda na ang mga kapulisan sa probinsiya agud magpatuman sang hugot nga seguridad sa nagahilapit nga May 13 midterm elections.
Ini ang ginpahayag sang tagpamaba sang Capiz Police Provincial Office nga si Police Executive Master Sergeant Donna Asmod sang mainterview sang Bombo Radyo.
Suno kay Asmod, all-set na ang security plan nga ipatuman sang mga kapulisan para sa nasambit nga piniliay.
May gintukod suno sa iya nga Provincial Joint Security Control Center nga ginapangunahan sang Commission on Elections (Comelec).
Suno pa kay Asmod nga nakaalerto sa tanan nga oras ang mga kapulisan humalin pa sang nagpatigayon sang mga pre-election activities.
Kalakip sa ginpatigayon nga pre-election activities sang hanay sang pulisya amo ang peace covenant signing agud makuha ang commitment sang mga kandidato nga indi sila maggamit sang mga makahas nga tikang para lamang magdaog sa amo nga piniliay.
Nagtingob man sang pwersa ang hanay sang pulisya kag Armed Forces of the Philippines (AFP) sa pagpation sang mga checkpoints.
Gindugang pa ni Asmod nga may mga iga-deploy nga mga kapulisan sa tanan nga mga voting precincts sa adlaw sang eleksiyon.
