ROXAS CITY – Ginkalipay sang sektor sang transportasyon ang desisyon sang senado nga temporaryo anay nga isuspendir ang Public Transport modernization program ukon ginatawag anay nga Public Utility Vehicle (PUV) modernization program.
Sa pagpakig-angut sang Bombo Radyo kay Mr. Joseph Carandang, Presidente sang PISTON-Capiz, ginpahayag sini nga pabor sila nga temporaryo anay nga isuspendir ang PUV modernization bangud madamo sang problema ang nasambit nga programa kag wala masyado ma-edukar ang mga driver kag operators.
Dugang pa sini nga mahinay ang financing cost sang modern jeep nga nagabalor sang masobra P2-Million kag indi makasarang ang mga ordinaryo nga driver kag operators.
Suno pa kay Carandang nga madamo na sang nag-withdraw nga kooperatiba kag madamo ang napiyerde.
Pahayag pa sini nga indi malain ang kooperatiba apang nabudlayan man ang mga operators sa pagbayad sang minilyon nga utang.
Para sa ila pabor man sila sa modernization program basta tawhanon kag may balatyagon nga pagpatuman sang gobyerno nga wala sang may makakasan sang pangabuhianan.
