Nagpanawagan si Sen.Risa Hontiveros nga ilakip ang transport cooperatives sa bulig sang gobyerno agud masabat ang nagataas nga presyo sang langis tuga sang nagapadayon nga inaway sa Middle East.
Suno kay Hontiveros, sa subong wala sang ayuda nga nagakadto sa mga kooperatiba rason nga madamo nga mga drivers ang indi makabyahe, ilabi na nga gin-suspend ang plano sa pagpataas sang pletehan.
Pahayag pa niya nga dapat suportahan ang tanan nga transport service provider indi lang ang mga indibidwal nga yara sa krisis agud malikawan ang pagkaparalisado sang pampubliko nga transportasyon sa pungsod.
Dugang pa sini nga ang ayuda dapat magkadto sa tanan nga sahi sang PUV drivers, bisan pa nga indi sila isa sa mga pinakapigado, bangud kinahanglan nila ang gilayon nga dugang nga kita.
Bilang sabat, ginpangabay niya ang Department of Budget and Management (DBM) nga tun-an kon paano magamit ang P30 bilyon nga pundo sang Department of Social Welfare and Development (DSWD) para sa ila Assistance to Individuals in Crisis Situation (AICS) nga programa, subong man ang suporta sa iya ginaduso nga supplemental budget nga P52.8 bilyon. Kalakip diri ang P12 bilyon nga transport subsidy para sa PUV drivers, delivery riders, kag TNVS drivers.
Apisar nga gin-suspend ni President Ferdinand Marcos Jr. ang natalana nga one-peso fare hike, nagpaguwa ini sang P21.47 bilyon para sa fuel subsidies sang mga drivers.
