Nagpanawagan si Senate President Pro Tempore Panfilo “Ping” Lacson kay retired Supreme Court Associate Justice Antonio Carpio kag UP Professor Jay Batongbacal nga indi na mag-intra sa gin-proponer nga debate ni Sen. Rodante Marcoleta nahanungod sa Kalayaan Island Group (KIG).
Suno kay Lacson, ang amo nga debate mahimo magdala sang kahadlok kag makaapekto sa pagpuyo sang mga residente sa Barangay Pag-asa, Palawan.
Gintawag niya ini nga “pointless debate” nga posible magbutang sang Pilipino nga dugay na nagapuyo sa isla sa delikado nga kahimtangan.
Nahibaluan nga ginbaton ni Carpio ang pagpangghangkat ni Marcoleta para sa isa ka “friendly debate” parte sa soberanya kag maritime security, samtang si Batongbacal ang isa man sa mga gin-imbitar.
Una na nga ginbatikos si Marcoleta matapos mag-suggest nga mahimo na lang i-surrender ang Kalayaan Island Group bangud yara ini sa guwa sang exclusive economic zone sang Pilipinas, nga nagpahadlok sa pila ka senador kag eksperto.
