Ginpatuman sang Department of the Interior and Local Government (DILG) ang direktiba sa idalum sang Memorandum Circular 2026-066 nga gin-isyu sang Enero 29, nga nagadumili sa pagbutang sang mga pangalan, laragway, slogan, logo, initials kag iban pa nga simbolo nga mahimo iangot sa sin-o man nga opisyal sang gobyerno sa mga proyekto kag karatula sang gobyerno.
Ginhatagan pagtamod sang DILG nga ang mga programa nga ginapondohan sang gobyerno ang naghalin sa buwis sang pumuluyo kag indi dapat gamiton bilang personal political tools, gani nagmando man ang ahensya nga gilayon nga kakason ang nagaluntad nga mga materyales nga wala nagasunod sa polisa.
Kadungan sini, ginpabutyag ni Senate President Pro Tempore Panfilo “Ping” Lacson ang iya bug-os nga suporta sa nasambit nga direktiba kag ginpahayag nga ang mga billboard kag karatula nga nagaunod sang mga nawong kag ngalan sang mga pulitiko ang indi nagakabagay para sa serbisyo publiko, bangud ini ang gina-alegar nangin pamaagi sa pag-claim sang kredito kag mahimo man magpatimaan sang korapsyon ukon sobra nga paggasto, indi lamang sa proyekto kundi pati man sa mga karatula nga ginapakita sa mga nawong kag ngalan sang mga politiko.
Dugang pa sang senador nga ang national budget dapat magserbe sa interes sang publiko kag indi paggamiton bilang gamit para sa personal nga benepisyo sang mga yara sa poder.
Ginhatagan man sini sang pagtamod ang iya madugay na nga pag-uswag sa pagpugong sang mga hilikuton sang “epal”, lakip ang pagbutang sang mas maathag nga safeguards sa 2026 national budget agud malikawan ang political patronage kag pag-abuso sa publiko nga pundo.
