ROXAS CITY – Tuman ang pagpasalamat ni Senator Sonny Angara kay Presidente Bongbong Marcos Jr. sa pagpahamtang sa iya bilang bag-o nga Department of Education (DepEd) secretary kabaylo sang nagbiya nga si Vice President Sara Duterte.
Suno kay Angara, tuman ini nagapasalamat sa pagsalig sa iya sang presidente.
Dugang pa sini nga iya ginabaton ang daku nga responsibilidad kag preparado ini nga pagatumanon kahandaang ang katungdanan bilang tiglikom sang DepEd.
Ginpasiguro ni Angara ang iya nga pagpakigkooperar sa tanan nga sektor kalakip na ang iya nga predecessor nga si VP Duterte agud masiguro nga ang kada kabataan nga Pilipino ang may access sa dekalidad nga edukasyon.
Preparado man ini nga makatrabaho si Presidente Marcos kag ang bug-os nga administrasyon agud alagaran ang mga estudyante, suportahan ang mga manunudlo kag pasangkaron pa ang kabug-usan nga kalidad sang edukasyon sa bug-os nga pungsod.
Matandaan nga kahapon, una na nga nagpahayag si Angara nga bukas ini nga mangin DepEd secretary ilabi na sa ulihi nga termino sini nga pagka-senador.
Si Angara ang nagtapos sang Masters of Law sa Harvard University, nagserbe bilang senador halin 2013 tubtob sa subong, nangin kongresista sang Aurora halin 2004 tubtob 2013, kag isa sa mga nagduso sang mga layi sa edukasyon kasubong sang Kabalikat sa Pagtuturo Act, Excellence in Teachers Education Act, Universal Access to Quality Tertiary Education Act ukon Free College Law, Student Fare Discount Act, K to 12, Open Learning and Distance Education Act, Anti-Bullying Act kag madamo pa nga iban.
