PONTEVEDRA CAPIZ – Dead on arrival na sang ginpadangat sa Bailan District Hospital ang isa ka senior citizen matapos maluthang patay sa Sitio Mantawad, Barangay Malag-it, Pontevedra Capiz.
Ginkilala ang biktima nga si Josefina Asong, 68-anyos samtang ang ginapahayag suspek ang ginkilala kay Jovannie Abulocion Catalan, 46-anyos lunsay mga residente sang nasambit nga lugar.
Sa impormasyon nga nakuha sang Bombo Radyo nagikan sa Pontevedra Municipal Police Station, ginapahayag nga natabo ang insidente takna alas 9:00 sang gab-i apang nareport sa ila talatapan alas 10:00 na sang kagab-ihon.
Mahibaluan nga antes ang insidente, ginapahayag nga naakig ang suspek sa bata sang biktima kabangdanan nga may natabo nga komosyon sa magtimbang nga bahin.
Dugang pa diri nga may dala na nga armas luthang ang suspek kag didto tiruhon kun tani sini ang bata sang biktima apang napamalabagan ni Asong kabangdanan nga siya ang aksidente nga na-igo sa dughan.
Gintinguhaan pa sang pamilya sang biktima nga ginpandangat sa ospital para kun tani sa nagakaigo nga pagbulong apang gindeklarar ini nga dead on arrival sang doctor.
Narekober sa lugar ang isa ka basiyo nga bala sang wala pa matumod nga armas luthang.
Sa karun nagapadayon ang hot pursuit operation sang Pontevedra MPS batuk sa nasambit nga suspek.
