ROXAS CITY – Naglab-ot sa P38,000 kag cellphone ang nayaban sang tatlo ka miyembro sang Budol Budol gang sa 64-anyos nga senior citizen.
Suno kay PO2 Danreb Suarez, imbestigador sang Dumarao PNP nagluntad ang insedente samtang nagabakal sang bulong ang biktima nga si Rosela Lopez sang Barangay Tinaytayan, Dumarao sa isa ka botika sa Passi City.
Ginpalapitan ini sang mga suspek sa diin nagpakilala ang isa nga abyan sang anak sang ginang.
Nagpakita sang kaayo ang mga suspek kag ginpasakay sa ila salakyan ang biktima, apang samtang nagabiyahe sila, napaako si Lopez sang mga suspek nga ginahatagan ini sang kuwarta sang mga anak nga nagatrabaho sa luwas sang pungsod.
Agud pamatud-an ang iya ginahambal, nagpauli ini sa ila nga balay kag sa iya pagbalik dala na sini ang kuwarta.
Apang matapos nga masulod ang kuwarta sa pouch kag ginpakita sang mga suspek ang ginpahamtang nila nga kuwarta, gilayon sila nga naglakat.
Nakapauli na sa ila balay ang biktima sang madumduman nga buksan ang pouch kag daku ang kakibot sini sang makita nga papel ang unod sini.
