Kasubong na-trauma ang isa ka senior citizen nga market vendor matapos giNaalegar ginpangwas-ag kag ginhaboy pa ini sang ginabaligya nga panakot sa old public market sang Barangay Hipona, Pontevedra, Capiz ni Kapitan Resty Oquendo.
Ginpahayag ni Nanay Merlinda 70-anyos nga ginkadtuan ini kaina sang aga sang tinawo ni Kapitan Oquendo kag ginhambalan nga ma-transfer sila sang iban nga vendors sa bag-o gintukod nga merkado publiko sa Crossig Texas sang nasambit nga barangay.
Apang nagpangabay ang tigulang nga indi siya maghalin bangud nagalain ang iya pamatyag kag malayo ang area.
Ginkakibot sang ginang sang nakita nga nagapadulong si Kapitan Oquendo kaupod ang anak nga si Sultan.
Ginpamangkot sini ang ginang nga nagpangayo sang pasaylo nga indi makabaligya sa bag-o nga merkado bangud magluwas nga malayo, mainit ang lugar kag nagalain pa ang iya pamatyag.
Apang nakibot si Nanay Merlinda sang hinali ginwas-ag ni Kapitan Oquendo ang iya baligya kag ginhaboy pa ini sang kamatis kag sibuyas.
Bangud sa kahadluk nagpalangurog ang bilog nga lawas sang tigulang kag naghibi na lamang ini.
Ginsuportahan naman ni Manang Roselyn ang nangin pahayag sang iya iloy.
Suno sa ginang ginhaboy siya sang langka sang anak ni Kapitan Oquendo nga si Sultan.
Wala pa ini makuntento ginhaboy sa iya ang lubi nga panggata kag gilampus ang bangko apang sa maayo nga palad wala siya naigo.
Gintuyo man nga kuhaon ang iya nga cellphone matapos nakita nga ginakuhaan sii sang video ang ginhimo ni Kapitan Oquendo.
Apang madasig niya ini nga gintago sa iya bulsa.
Ginapanindugan ni Manang Roselyn nga matood ang tanan nga ginahambal ni Nanay Merlinda apang nahadluk lamang sila kay Kapitan Oquendo.
