PILAR, CAPIZ– Wala na sang kabuhi sang nasapwan sang iya asawa ang isa ka senior citizen sa Barangay San Fernando, Pilar, Capiz.
Ang biktima amu si alyas “Willie” 66-anyos, kag residente sang nasambit nga lugar.
Sa interview sang Bombo Radyo kay Police Staff Sergeant Jay Pee Tomogda, Imbestigador sang Pilar Municipal Police Station, ginpahayag nga nakabaton ang ila nga talatapan sang isa ka tawag kun sa diin nagapahibalo nga may yara sang isa ka lawas sang persona nga nasapwan nga wala na sang kabuhi.
Dugang sini, pag-abot nila sa lugar, nagahapa ang lawas sang isa ka persona nga gilayon gindala sa ospital sang mga katapo sang Pilar Municipal Disaster Risk Reduction and Management Office (MDRRMO), apang gindeklarar ini nga dead on arrival sang doktor nga nag-atendir.
Nahibaluan nga yara sa impluwensya sang makahulubog nga ilimnon ang biktima, kun sa diin nga natumba ini kag naigo ang ulo sa hollow block, rason sang pagkadula sang kabuhi sini.
Sa karon, yara na sa isa ka purenarya sa nasambit nga banwa ang bangkay sini.
