ROXAS CITY – Ginalauman nga sumugod sa katapusan nga semana sang bulan sang Oktubre ang pagpadulong sang mga tawo agud magbisita kag maghalad sang pangamuyo sa ila mga pinalangga nga nagtaliwan sa Banica Public Cemetery.
Ini ang nangin pahayag ni Lowill Fernandez, isa ka sepolturero sa nasambit nga sementeryo, sang mainterview sang Bombo Radyo.
Suno diri, nga sa karon nga tinion, may pipila naman nga nagapadulong sa patyo apang ginalauman nga sa masunod nga semana ini magadamo.
Mahina paman suno diri ang kita sa iya nga trabaho kag sa mga nagabaligya sang kandila sa guwa sang sementeryo.
Mahimo man nga makapahawan ukon magpapinta sa mga pantyon ang himata sang nagtaliwan pinaagi sa pagbayad sang 100 tubtob 150 pesos.
Nahibaluan nga wala pa makapaguwa sang executive order ang alkalde sang syudad para sa maabot nga ‘Undas 2021’
