Nasolusyonan ang pag-shutdown kun tani sang gobyerno sang Amerika matapos nga mapasar na sang US Congress ang budget deal.
Una na nga gin-aprubahan sang US House of Representatives ang nasambit nga bill sa boto nga 366-34 kag makaligad ang isa ka oras ginhingagaw sang US Senate ang pagpasar sini sa boto nga 85-11 apisar lapaw na ini sang masobra tunga sa oras sa deadline kaina sang tungang gab-i sang Sabado, Disyembre 21.
Sa idalom sang bag-o nga spending plan, palawigon ang fiscal levels tubtob Marso 14, magahatag sang $110 billion para sa relief para mabuligan ang mga natural-disaster survivors kag aid farmers.
Apang indi kalakip sa gin-aprubahan nga pondo ang demand ukon ginapangayo ni President-elect Donald Trump sa mga mamalidha nga taasan ang debt ceiling sang federal government nga nagapakita sang limitasyon sang ikasarang ni Trump agud manduan ang mga lawmakers gikan sa iya kaugalingon mismo nga Partido.
Ginpasa na ang nasambit nga bill kay US President Joe Biden agud dalayon nga permahan bilang isa ka kasuguan.
Sa isa naman ka statement gikan sa tagpamaba ni Biden, ginkumpirmar sini nga gin-aprubahan na sang Presidente ang nasambit nga budget deal.
Bangud sini, nasalbar ang Paskwa sang masobra 800,000 nga mga mamumugon nga indi masweldohan sa tion nga nadayon ang government shutdown samtang gin-untat naman sang White House ang mga preparasyon sini para sa shutdown.
Matandaan, pinakaulihi nga natabo nga government shutdown sa Amerika sadtong una nga termino ni Trump sadtong 2019 nga nagdugay sang 35 ka adlaw nga amu ang pinakamahaba nga government shutdown sa kasaysayan sang Amerika.
