ROXAS CITY – Ginapasalig sang Simbahan Katolika nga magapadayon ang pagpatigayon sang hublag protesta tubtob nga wala sang may mapreso nga naangot sa korapsyon sa flood control kag indi mabalik ang ginkawat nga pondo sang mga pumuluyo.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga nagakadapat nga seryusohon sang gobyerno ang panawagan sang publiko nga imbestigaran sang maayo ang maanomaliya nga flood control projects sa pungsod.
Suno kay Oso, humalin 2022 tubtob subong nga tuig, ginabanta P1 trillion ang ginwasi sang mga involved sa kontrobersiya sa tunga mismo sang kaimulon nga na-eskperyensyahan sang mga pumuluyo.
Ginpahanumdom sang natungdan sa mga opisyal sang gobyerno nga ang ila nagapanguna nga trabaho amo ang pagserbisyo sa ikaayo sang mga Filipino kag indi nga sa ikaayo sang ila mga bulsa.
