WASHINGTON, D.C – Nagpaguwa sang bag-o nga dokumento ang U.S government tuhoy kay Jeffrey Epstein, ang late financier kag convicted sex offender.
Ang files ang ginalakipan sang 3 million pages, 180,000 photos, kag 2,000 videos.
Na-mention diri ang madamo nga manggaranon kag may gahom nga mga tawo, lakip na sanday Elon Musk, Bill Gates, Donald Trump, kag Richard Branson.
Apang apisar nga ginpangalanan sa dokumento, indi buot silingon suno sa mga reports nga may yara sila sang may ginhimo nga malain.
Madamo sa ila ang nag-deny nga may gin-ubra sila nga sala.
Ang pagguwa sang dokumento ang kasunod sang Epstein Files Transparency Act nga naga-require sa gobyerno nga himuon nga publiko ang tanan nga dokumento.
Pahayag sang pila ka mga lawmakers, tubtob subong, wala pa sa gihapon masapubliko sang gobyerno ang tanan.
Yari ang pila ka mga personalidad nga gin-mention kag ang ila tagsa ka mga response:
*Elon Musk – May mga emails nga nagapakita nga naga-diskusyon ini sang iya travel plans kay Epstein. Apang suno kay Musk, wala ini makabisita sa isla ni Epstein kag concerned ini sa hustisya para sa mga biktima ni Epstein.
*Bill Gates – May mga emails nga natukiban nga wala ma-send sa iya. Apang suno sa team ni Gates, wala ini sang kamatuoran.
*Donald Trump – Nagguwa man ang iya pangalan apang unverified sa gihapon ini kag mismo si Trump ang nag-deny sang akusasyon.
*Richard Branson – May mga emails nga nagapakita sang limitado nga business kag charity contact kay Epstein sang nagligad pa nga 12 ka tuig. Apang suno sa iya, gin-utod na niya ang tanan nga contact sini matapos matukiban ang krimen nga ginhimo ni Epstein.
*Prince Andrew kag Sarah Ferguson – May mga photos kag emails nga nakit-an sa files, apang wala sang pruweba nga may sala ini nga ginhimo. Mismo ang duha ang nag-deny sa ano man nga ginaakusar sa ila nga misconduct.
*Other names – Steve Bannon, Sergey Brin, Ehud Barak, Noam Chomsky, Larry Summers, Bill Clinton, kag pila pa gid nga pangalan sang personalidad ang nakit-an sa files. Apang ginpanginwala man ini nila.
Paandam sang mga eksperto, ang mga pangalan nga nakit-an sa files ang wala nagapamatuod nga may yara ang mga ini sang kahilabtanan sa krimen.
Ang dokumento ang nagapakita lamang sang mga komunikasyon, pagsinapol kag social events, kag wala nalakip ang ‘proof of criminal activity’.
Ang Epstein files ang padayon nga ginatutokan sa bilog nga kalibutan, samtang gina-review sang publiko ang minilyon ka pahina sang mga dokumento agud mahangpan ang koneksyon ni Epstein.
Nahibaluan nga si Epstein ang napatay sang 2019 samtang yara sa presohan.
