IVISAN, CAPIZ – Ginpatigayon sang Sangguniang Kabataan sang Barangay Poblacion Sur kaupod ang Ivisan Municipal Police Station ang isa ka symposium para sa Illegal Drugs Prevention and Awareness bilang kabahin sang ginahiwat nga Youth Camp sa banwa sang Ivisan.
Ginpangunahan ini ni PMAJ Ruby C. Magallanes, Hepe sang Ivisan PNP, nga nagtumod sa makatalagam nga epekto sang paggamit sang illegal nga droga.
Ginpasangkad man sini ang importansya sang papel sang mga pamatan-on sa kampanya kontra droga kag ang kinahanglanon sang aktibo nga partisipasyon sang komunidad.
Ginpaathag ni PMAJ Magallanes nga ang kampanya batuk sa illegal nga droga indi lang obra sang kapulisan kundi isa ka kolektibo nga responsibilidad sang komunidad, ilabi na sang kabataan nga masami target sang sini nga iligal nga bisyo.
Ang amo nga aktibidad kabahin sang padayon nga inisyatibo sang Ivisan PNP sa pagpalapnag sang impormasyon kag pagpalig-on sang kabakod sang komunidad batuk sa droga.
Paagi sa edukasyon kag kooperasyon sang pumuluyo, ginahandom nga mangin drug-free ang Ivisan kag maprotektahan ang kabuhi kag buwas-damlag sang kabataan.
Ang symposium ginkabig sang mga partisipante nga mapuslanon kag may daku nga impact sa ila panghuna-huna parte sa mga risgo nga dala sang illegal nga droga.
