Masobra tatlo ka bulan na nga gina-monitor sang mga kapulisan ang isa ka SLI nga nadakpan sa ginkasa nga buybust operation sang mga katapo sang kapulisan sa Barangay Sublangon, Pontevedra, Capiz.
Ginkilala ang nadakpan nga si alyas “Danilo”, 46-anyos kag residente sang Brgy. Binuntocan, Pontevedra, Capiz.
Sa interview sang Bombo Radyo kay PMAJ Greg Anthony Salbang, hepe sang Pontevedra MPS, ginpahayag sini nga masobra 3 na ka bulan nila nga ginamonitoran si Danilo kag natigayon ini nga madakpan pinaagi sa isa ka pulis nga nagpakuno-kuno nga buyer.
Nakuha sa paghinakop sini ang (1) ka homemade 5.56 revolver, tatlo ka mga bala, lakip na ang tatlo ka sachets sang ginapatihan iligal nga droga nga may kabug aton 1 ka gramo kag may standard drug price nga 6, 800 lakip na ang 4, 500 nga buybust money.
Kaso nga paglapas sa RA 10591 kag RA 9165 ang pagaatubangon ni Danilo.
Dugang pa ni Salbang, wala gauntat ang ginahiwat sang mga ini nga operasyon sa mga padayon nga nagagamit kag nagabaligya sang iligal nga droga kag armas sa nasambit nga banwa.
Sa karon, yara na ini sa kustodiya sang Pontevedra MPS para sa nagakaigo nga disposisyon.
