ROXAS CITY – Ginklaro sang pamunuan sang Capiz Provincial Environment and Natural Resource Office (CAPENRO) nga wala sang bayolasyon ang small scale quarry operation sa Sitio Rosario, Barangay Lonoy, Roxas City.
Ini ang ginpahayag ni CAPENRO Head Atty. Emilyn Depon sang mainterview sang Bombo Radyo.
Suno kay Depon nga kasunod sang reklamo sang mga pumuluyo, ila gilayon nga ginpausisa ang nasambit nga operasyon sa lugar.
Magluwas diri may ginpatigayon man nga technical conference kun sa diin ginpalab-ot sang mga pumuluyo ang ila reklamo.
Apang suno kay Depon nga kasunod sang ila nga pag-tsekyar natukiban nga wala man sang anuman nga bayolasyon ang operasyon sang small scare quarry sa lugar.
Ini bangud may mga mitigating measures man ini nga ginahimo sa mga epekto sang amo nga operasyon.
Matandaan nga nagreklamo ang mga pumuluyo sa lugar bangud sang nagakalawigit nga ginakarga nga buga nga nagatuga sang malignaon nga dalan.
Magluwas diri nagawangal man ang mga pumuluyo bangud sa gap-od ukon yab-ok sa dalan nga paglutak sa tagsa ka mag-ulan.
